දමිතා අපේ වාර්තාකාරියක් නොවේ !
10 April, 2013 | | |
පසුගියදා සිදු වූ ශී‍්‍ර ලංකා මිරර් සහ ශී‍්‍ර ලංකා එක්ස් නිව්ස් වෙබ් අඩවි පවත්වාගෙන ගිය කාර්යාල වැටලූ අවස්ථාවේදී එම කි‍්‍රයාව සාධාරණීකරණය කරමින් දමිතා අබේරත්න විවිධ රූපවාහිනී නාලිකාවන්ට ‘වොයිස් කට්’ ලබාදෙන ලදී. එම වොයිස් කට්වලදී දමිතා අපගේ අවබෝධතා ගිවිසුම කිසිවිටෙක කඩ නොකළාය. ඇය කිසි අවස්ථාවක ‘පැපරාසියා’ට පහර දුන්නේ නැත. විවිධ පුද්ගලයින් ඒ පිළිබඳව විවිධ අර්ථ නිරූපණ සැපයූවත් ඇය කතා කළේ වෙනත් වෙබ් අඩවි ගැන මිස අප ගැන නොවේ. එසේ තම මතය ප‍්‍රකාශ කිරීම දමිතාට ඇති අයිතියකි.
ශී‍්‍ර ලංකා මිරර්, ශී‍්‍ර ලංකා එක්ස් නිව්ස් මාධ්‍ය භාවිතාව ගැන ‘පැපරාසියා’ට සම්පූර්ණයෙන්ම එකඟවිය නොහැකිවා සේම, ‘පැපරාසියා’ගේ මාධ්‍ය භාවිතාව පිළිබඳවද ඔවුන්ට මෙන්ම විවිධ පුද්ගලයින්ටද විවිධ ගැටලූ තිබිය හැක. මාධ්‍ය ලෝකයේ බරසාර න්‍යායන් අපට නැත. නමුදු අපි ඒවාට ගරු කරන්නෙමු. ‘පැපරාසියා’ගේ සරල මාධ්‍ය භාවිතාව වන්නේ ‘‘වැදෙන තැනකට වැදේවා.... රිදෙන තැනකට රිදේවා... වැදි රිදී හෝ හැදේවා’’ යන්නයි. එම න්‍යායේ පිහිටා අප තවදුරටත් කටයුතු කරන්නෙමු.
අපගේ යාවත්කාලීන කිරීම් සම්බන්ධයෙන් පාඨකයන්ට විවිධ ප‍්‍රශ්න ඇතිවී තිබෙන බව අප දන්නෙමු. ‘පැපරාසියා’ වෙබ් අඩවිය අප පවත්වාගෙන යන්නේ අපගේ දහසකුත් එකක් අනෙක් කාර්යයන් මධ්‍යයේය. එංගලන්තයේ ආගමන විගමන පාලකයන් මේ වනවිට අධ්‍යාපනය ලබන සිසුන් සඳහා දහසක් දණ්ඩ නීති පනවා ඇත. රැකියා කිරීමට ඇති කාලය පැය 20 කටත් වඩා අඩුය. පළමුව ජීවත් විය යුතුය. දෙවනුව අධ්‍යාපන කටයුතු කළ යුතුය. ඒ අතරතුර කාලය ‘පැපරාසියා’ වෙනුවෙන්ද වැය කරන්නෙමු. අපගේ අතරින් පතර නිහැඩියාව මැදහත් සිතින් විමසා අප සමග දිගටම රැඳී සිටින මෙන් පාඨක ඔබෙන් දයාබරව ඉල්ලා සිටින්නෙමු.
